Muna gabatar maku da sabon shafi na addu'o'i musamman wadanda aka ruwaito daga ingantattun Hadisan Iyalan Manzon Allah (s.a.w.a.) sai a duba shafin www.addua.org

SIRRIN AMSAR ADDU’O’I

          Yabo da godiya sun tabbata ga Allah madaukakin sarki, tsira da aminci ga shugaban manzanni Muhammad dan Abdullahi baban Sayyidah Fatimah Azzahra (a.s.)

            Allah wanda ya halicce mu ya hori bayinsa da su kira shi akan bukatunsu a kowane hali suke, wadata ko talauchi, tsanani ko dadi. Domin zasu iya gushewa a koyaushe kuma Allah shine zai iya canza wa bayinsa daga dadi zuwa wuya ko wadata da talauchi. Don haka kiranSa madaukaki a kowane lokaci yana da muhimmanci. Haka kuma bawa yana da bukatar fuskantar mahaliccinsa a kodayaushe don neman kariya daga sharrin shaidan da makiya da neman gafarar zunuban da aka aikata. Ana samun yardan Allah ta hanyar kusantarSa. Addu’a tana daga cikin hanyoyi mafi daukaka da girma wajan kusantar Allah.

            Akwai lokuta, wurare, ranaku, addu’o’in da za’a kira Allah dasu don samun ijaba cikin gaugawa kamar yanda Manzo (s) ya yi umarni tare da Iyalan Gidansa tsarkaka (a.s.) kamar yanda zamu kawo a takaice, don karfafawa da buda kofar nazari ga ‘yan uwanmu almajirai.

                                    LOKUTAN ADDU’O’I

(1) RANAR JUMA’A

             An samo daga Imam Jafar Sadiq (a.s) yana cewa a tsawon daren juma’a Allah yana kira yana cewa *ko akwai wani bawa na mai imani da zai kirani har zuwa kafin asuba in amsa mas bukatarsa na duniya da lahira, *ko akwai wani bawana mai imani da zai tuba akan zunubansa har zuwa kafin asuba in gafarta masa, *haka Allah zai yi ta kira game da mai bidar arziki, neman lafiya, neman kubuta daga kamu da kuma wanda aka zalunta.

            Imam Baqir (as)ya fada cewa “bawan Allah miminai yana rokon Allah sai Allah Ya yi jinkiri har zuwa Juma’a”.

            Manzon Allah (s.a.w.w.) yana cewa; tabbas juma’a itace shugaban ranaku kuma rana mafi daraja a wajan Allah duk da kuwa tana kasa da idin karama da babbar sallah. Juma’a tana da albarku guda biyar;

            *Allah ya halicci Adam (as) a wannan rana,

            *Allah ya saukar da Adam doron kasa daga aljanna a wannan     

             Rana

            *Allah ya dauki rayuwar Adamu a wannan rana,

            *Akwai wasu sa’o’i a ranar juma’a duk wanda ya roki wani   

             abu

              Wajan Allah zai same shi matukar halas ne,

            *Mala’iku, duniyoyi, kasa, iska, duwatsu da itatuwa suna

             tsoron

              cewa ranar tashin kiyama ta kasance a wannan rana.

‘Ya’yan Annabi Ya’aqub (as) sun roki babansu da ya rokar masu gafarar Allah, sai yace”zan rokar maku gafara daga ubangijina” game da wannan sai Imam As Sadiq (a.s) ya ke cewa Ya’aqub (a.s) yayi jinkirin neman gafarar har karshen daren juma’a.

            Akwai wasu sa’o’i a ranar juma’a da ake amsar addu’a da gaugawa, na farko shine a lokacin da liman ya gama huduba ana niyyar kabbara sallar juma’a, na biyun kuwa shine lokacin da rabin jikin rana ya shige giza-gizai yana gab da bacewa daga sama, watau sa’ar karshe ta ranar juma’a.  

(2) LOKACIN SALLAR TAHAJJOUD

 An samo hadisi daga manzon Allah (s.a.w.w) yana cewa duk wanda ke da bukata a cikinku, sai ya roka a lokacin sallar dare, domin kune aka baiwa wannan (daukaka) ba a baiwa wadanda suka gabace ku ba.

(3) KASHI DAYA NA KARSHEN SA’AR DARE

Manzo Allah (s.a.w.w) yace “a kowace sa’ar karshen dare Allah yana kira ko akwai wanda zai kirani in amsa masa, ko akwai wanda zai roke ni in bashi, ko akwai wanda zai nemi gafarata in gafarta masa, ko akwai wanda zai tuba in amshi tubarsa?”

Imam Sadiq (a.s) yana cewa “ kar kubar idanunku su shagaltu da barci, domin idanu su masu karancin godiya ne ga Allah” Manzon Allah (s..a.w.w) yana cewa “lokacin da mai imani na gaskiya ya tashi don kusantar Allah da nafilar dare a bayan tsakiyar dare alhalin barci na cin idanunsa, Allah zai yi magana cikin alfahari ga mala’ikunsa cewa ‘kunga bawan can nawa wanda ya tashi don yin sallar da ba farilla ba? Don haka na sanya ku zama shaida na gafarta masa zunubansa.’”

(4) RANAKUN IMAMAI (A.S)

            Kowace rana an kasa ta zuwa awa sha biyu, kuma kowa ce an dangantata da wani Imami, watau tana da alaka dashi. Haka ma ranaku suna da alaka da Imamansu don haka yana daga cikin hanyoyin ijaba da gaugawa a roki Allah da tawassuli da Imamin dake da alaka da ranar. Sayyid Ibn Tawous ya fada a cikin Mufatihul Jinan, haka ma a littafin ‘MESBAH’ ga yanda kason ranakun yake

Asabar- Manzon Allah (s.a.w.w)

Lahadi- Imam Ali (a.s)

Litinin-Imam Hassan da Hussain (a.s.w.a)

Talata-Imam Zainul Abdin , Baqir da Jafar as Sadiq (a.s.w.a)

Laraba-Imam Kazim, Reda, Jawad da Hadiy (a.s.w.a)

Alhamis-Imam Hassan Askari (a.s)

Juma’a- Imam Mahdi (a.t.f)

(5) DARAREN LAILATUL QADR

            Wadan nan wasu darare ne masu matukar ijaba da amsuwar addu’a da gaugawa kamar yanda yazo a ruwayoyi da dama. Wannan dare zai kasance a daya daga cikin darare uku ne kamar yanda yazo a ruwayar Iyalan gidan Manzo. Daren 19 , 21 ko 23 na watan Ramadan. Don haka aka yi umarni da a raya dukkan kowane daya daga cikin wadannan dare uku. Akwai ma ruwaitattun addu’o’i da aka kwao a littattafan addu’o’i irin su ‘mufatihul jinan’ da ‘mesbahul mutahajjud’

(6) DARAREN RAYAWA

            Akwai ma wasu dararen da aka so a raya su da ibadu, zikirori da addu’o’i don darajar dararen a wajan Allah (T). Wadannan darare sune

*daren farko na watan Rajab

*daren Nisfu Sha’aban (15 Sha’aban)

*daren karamar sallah

*daren babbar sallar 

(7) RANAR   ARFAH

            Rana ce da ake son a yawaita addu’o’i da ibadu tare da yin azumi a wannna rana, akwai ijaba sosai ga addu’o’in da aka yi a wannan rana.

(8) WASU YANAYI NA AMSAR ADDU’O’I

            Akwai samun dacewa na amsuwar addu’o’i a cikin wasu yanayi da suka hada da;

@ lokacin da iska ta kekadawa,

@ lokacin da ruwan sama yake zuba,

@ lokacin da ake kiran sallah da kuma

@ lokacin da jinin shahidi yake zuba.     

            Domin a daidai wannan lokaci kofofin aljanna suna a bude ne kamar yanda aka ruwaito daga Imam Sadiq (a.s)   

(9) ALFIJIR ZUWA FITOWAR RANA

            Abul Sabak Kanani ya ruwaito daga Imam Baqer (a.s)yana cewa Allah yana amsawa bayinsa masu yawaita addu’a, don haka kuyi addu’a da asuba har zuwa fitowar rana, saboda kofofin aljanna suna bude ne wannnan lokaci, ana raba arziki kuma ana biyan bukatu. 

(10)    BAYAN SALLOLIN FARILLAH      

Yana da matukar muhimmanci a yawaita addu’a a bayan sallolin farillah, domin hakan yana da muhimmmanci shine ma yasa wasu littattafan suka ruwaito addu’o’in da manzo (s) yake karantawa bayan kowa ce sallah.

KARIN BAYANI       

1. Akwai wasu addu’o’i masu dauke da sunan Allah mafi girma da in har aka kira shi dasu zai amsa da gaugawa, daga ciki akwai ;-           

      ‘Ya Hayyu ya Qayyum’, Ya zaljalali wal ikram’, ‘Ya huwa ya man la huwa illa huu’  fadar ‘ya rabb’ sau goma ko ‘ya Allahu’ shima goma.

2. Akwai wasu addu’o’i masu matukar ijaba don kasancewarsu saukakku ga manzo da iyalansa ko kuma ma’asurai, kamar irinsu addu’ar kumail, mashlool, sammat, mi’iraj’ azumal bala’ da makamantansu.
3. Ana son yin addu’a a wasu bagire na musamman domin matsayinsu ga Allah da kuma amsuwar ita addu’ar take yanke domin matsayin wurin kamar irin su filin arfa, masharul haram, masallaci da kuma kusa da kabarin Imam Husaain. Kamar yanda wata rana Imam Sadiq ya bukaci ayi masa hayar wani yaje yayi masa addu’a a kabarin Imam Hussain (a.s) shine mutumin yake mamaki har ya tambayi Imam din shine ya amsa masa da cewa ‘wannnan mutum ya fadi gaskiya, sai dai bai san cewa ba Allah yana da wasu wurare na musamman dayake amsaraddu’o’i, kabarin Imam Hussaini yana daga cikinsu’
4. Har wala yau yakini shine ginshikin amsuwar addu’a, domin duk wanda yake rokon Allah ya koma yana kokwanton amsuwar to tamkar bai yi imani da lakawarin Allah bane da yace ku rokeni zan amsa maku (Allah ya tsaremu). Masu yakini suna tare da kwanciyar hankali da natsuwa tun bayan da suka gama sanar da Allah bukatunsu.

  *****Don neman karin bayani da ilimintuwa game da abin da ya shafi addu’o’i da Iyalan Manzo sai a duba wadannann shafuka na yanar gizo (Internet)

1.www.duas.org

2.www.duas.8m.com